ترجمان دفتر خارجہ نے کہا ہے کہ پاکستان مسلمان معاشروں میں لڑکیوں کی تعلیم کے حوالے سے عالمی سمٹ کی میزبانی کرے گا۔
نجی ٹی وی “دنیا نیوز” نے دفتر خارجہ کے ترجمان کے حوالے سے بتایا کہ وزرات تعلیم ”مسلم کمیونٹیز میں لڑکیوں کی تعلیم کے چیلنجز اور مواقع“ کے موضوع پر 11 اور 12 جنوری کو سمٹ میں بطورمیزبان شریک ہوگا، اجلاس کا مقصد دنیا بھر کے مسلمان معاشروں میں خواتین کی تعلیم کو آگے بڑھانے میں درپیش چیلنجز سے نمٹنا ہے۔
ترجمان نے بتایا کہ اجلاس کا مقصد خواتین کے تعلیم کے حوالے بات چیت کو فروغ دینا ہے اورخواتین کے تعلیم چیلنجوں سے نمٹنے کے لئے قابل عمل حل تلاش کرنا ہے، کانفرنس اعلیٰ سطح کی بات چیت اور تعاون کے لئے ایک مثالی پلیٹ فارم فراہم کرے گی۔ تقریب کا افتتاح وزیر اعظم محمد شہباز شریف کریں گے، وہ افتتاحی سیشن میں کلیدی خطاب کریں گے۔
ترجمان نے مزید بتایا کہ سمٹ میں 44 ممالک کے وزراء ، سفیروں سمیت 150 سے زائد بین الاقوامی شخصیات کے علاوہ سکالرز، ماہرین تعلیم، یونیسکو، یونیسیف اور ورلڈ بینک سمیت بین الاقوامی اداروں کے نمائندے بھی شرکت کریں گے جبکہ کانفرنس کے اختتام پر اعلامیہ پر دستخط بھی ہوں گے۔
